Océtowin

Otáspasinahikéwin(ak): PelmuSnowbird

Ké isi pétákoninik kitocikéwina Bret Parenteau

February 2021 to February 2022

Anima mino nakiskátowin kitakí cíkénitákok kétatawén mwác ékosi kititamacihon éko móna náspic ki cíkénitamihikon éyako. Anima cikástécicikan kákí ositániwak épapékáciy nócitácik kékwána isi nókon. Éko óma mékwác ká pimipanik maci ákosiwin kakinaw awiyak ká kiskénitak ékwani ékwéniw oci éká awiyak ita ká nókosit. Éko anima océmitowin awasimé ániménitákon éko mína nawac nanísánan aspin kákí máci akiskikátéki anihi ákwacápahona. Anima ká papékáciy nókopanik cikástécicikan é kiski nókotamákawiyak éspíci wétátisiyak óma éko ká isi pimácihoyak éko óma káwí moci péyataki itótaman kékwána kétatawén ániménitákonwa óma oci maci ákosiwin ká pimipanik mékwác.

Óma cikástécicikan éki ositániwak kákí kakéskinawápacikáték ta isítániwak anima Bill Viola’s 1995 cikástécicikan Nakiskátowin kákí isinikáték. Anima cikástécicikan kákí ositácik anikik PelmuSnowbird ocitaw kí isítáwak kita papéyatak é isi nócicikécik ininiwak isinákon. Ayik óma kákí tasi ositániwak ká ati pakisimok Winnipeg éko ká ati pétapaniwak oté Minahiko Sípik Iskonikanik. Óma oci ká pimipanik maci ákosiwin éko ká maci mósihoyan éko ká maci mamitonénitamihikoyan, ékwéniw wéci kaskétaméninákok óma éko éká awiyak ita énokosit.

É kiskisi nókotániwak óma ké isi péyako kaskénitákok óté níkánik mwéci anihi ká isi nókotániwak éko ká iténitákik kékwána ké isinákoki anté anihi Hollywood cikastécicikana kákípé isi nókotácik. Anima ispík kákí cakástécicikániwak óma ká ati pakisimok, óta óma ká ayániwak Winnipeg, óma ká paskwéskák, ana písim mwéci épasiték anté pakisimonák éko anihi wásko ékosi mína ésinákoki ékwani. Anima kápétápak kákí cakástécicikániwak óté Pine Creek, é kostási minonákok mwéci anima kákí pimátisit otáspasinahikéw Germanic Matthias Grunewald, ita anihi ká cipétakwánáskwak éko ká mikwánaskwák éko anihi ká osawánaskwák éko ká mikosawánaskwák é mámawi nókotániwaki ta mámawi nócicikémakaki mwéci éwí paspímakaki ta isi pimácihonániwak.

Óma ká isi “mamátáwi nókotániwak”, anima ká kaskénitaminákok Kris éko nína ká miciminitoyák óma éwí océmitoyák máka pakán ta isi atótamák ékwéniw óma oci ká kikiskamák ákwacápahona ká iskwá pimipanik anima maci ákosiwin. Péyak ana kikiskam anima ákwacápahon kákwa éko míkwana ékí oci ositániwak éko ana kotak kikiskam anima ákwacápahone éki oci ositániwak sáponikana ká isi cípokásák éníkánamoki ita.

Éko anima káwí océmitonániwak awasimé animénitákon éyako ta itócikániwak wina ékikiskaman anima ékotowa ákwacápahon. Anihi ká kikiskamák kékwána sínipánékin ki ápatan ta ositániwaki, énákasik, ká mikonákok, cipétakonákon éko osáwinákon éko ká wápiskinákok ká minonákoki ótá ká pawástaki ká piponiwépak ispík óta Winnipeg. Ómá ká papéyatakonákok mékwác ká océmitonániwak ékwéniw é nókotácik tánisi óma ési itócikáték éyako éko tánisi ésinákok ké itamacihiskákoyan éyako. Óma cikástécicikan é kiskisi nókotamákawiyak tánisi óma náspic ési wététisiyak ta nisiwanácihoyak ta nisiwanátak óma ki pimácihonaw éko óma kákí wétak ta itócikániwak kayité náspic éko ániman ékosi é ániménitákok maci ákosiwin é pimipanik.

Awiniwak Nínanán

PelmuSnowbird(Theo Pelmus éko Kris Snowbird), pápakán kípé isi opiki pimácihowak kákí oskatisici ispík péyak ana akámaskík óci, Romanian éko ana kotak Anisinápéw Ojibwe-Cree ká itit. Ékwáni ásay níso askíya óma ékí nísókamák ta ositáyák óhi itowa cakástécicikana éko éwí papá nokótáyák óma ékí kaskitáyák óhi pá pakán nitisi pimácihonani ta máwai péyako wítamák kékwána. Ésinísiyák é kakwé miskamák tanté óma wétácihoyák éko tánisi ési ákótamák óma óta askík ká ayáyák. Ésinísiyák nitatoskáténán é natonamák nanátok oskáya nócitáwina óma mána káwí cikástépitamák kékwána wéká tánisi óma káwí isi nókotáyák anihi ni mócicikéwináni.